Av. Andi Skënderi

Av. Andi Skënderi është avokat i licencuar, me mbi 13 vjet përvojë profesionale në fushën juridike, të fokusuar kryesisht në të drejtën civile, tregtare dhe administrative, prokurimet publike, ndërtimin, investimet dhe këshillimin ligjor.

Prej vitit 2016 ushtron funksionin e Avokatit dhe Drejtorit të Zyrës Ligjore pranë Hyseni & Associates Law Firm, ku është angazhuar në këshillimin dhe përfaqësimin ligjor të personave fizikë dhe juridikë në çështje të natyrës civile, tregtare dhe administrative, si dhe në problematika që lidhen me aktivitetin e shoqërive tregtare, kontratat, prokurimet publike, ndërtimin dhe investimet. Gjatë karrierës së tij profesionale ka ushtruar gjithashtu funksione juridike dhe drejtuese pranë subjekteve private që operojnë në sektorët e ndërtimit dhe prokurimeve publike.

Krahas praktikës së avokatisë, është angazhuar edhe si këshilltar i jashtëm ligjor pranë institucioneve publike, duke ofruar ekspertizë dhe asistencë juridike në çështje të së drejtës administrative, tregtare dhe kontraktore, prokurimeve publike, si dhe në procese të ndryshme institucionale.

Av. Skënderi ka përfunduar studimet në Fakultetin e Drejtësisë të Universitetit Europian të Tiranës, ku ka përfunduar gjithashtu studimet LL.M., me profil në të Drejtën Kushtetuese dhe Administrative. Punimi i tij akademik është fokusuar në ndryshimet administrative në kuadër të procesit të integrimit të Shqipërisë në Bashkimin Europian. Është i licencuar për ushtrimin e profesionit të avokatit në Republikën e Shqipërisë.

Formimi i tij profesional është plotësuar në vijimësi përmes pjesëmarrjes në programe dhe trajnime kombëtare dhe ndërkombëtare. Ndër të tjera, ka marrë pjesë në trajnim pranë Gjykatës Europiane për të Drejtat e Njeriut në Strasburg, është trajnuar dhe certifikuar nga Departamenti i Administratës Publike (DAP) në fushën e prokurimit publik, si dhe ka ndjekur Shkollën e Integrimit Europian, organizuar nga Global Opportunities Albania në bashkëpunim me Hanns Seidel Foundation. Ka marrë pjesë gjithashtu në Moot Court Competition, në kuadër të një projekti të OSCE-së.

Është certifikuar nga International Labour Organization (ILO) në kuadër të programit “Të drejtat e të rinjve në punë”, ka ndjekur programin TEMPUS – “Increasing Student Leadership Capacity” dhe është certifikuar nga European Youth Forum në kuadër të simulimit të Modelit Europian. Gjatë formimit profesional ka zhvilluar gjithashtu praktikë pranë Gjykatës për Krime të Rënda, Dhoma Penale.

Në kuadër të formimit dhe angazhimit të tij akademik, është përzgjedhur ndër 100 studentët e ekselencës në Shqipëri për pjesëmarrje në një program trajnimi të organizuar nga Ministria e Drejtësisë. Është gjithashtu fitues i konkursit kombëtar të DAP me temë “E ardhmja e administratës publike në kontekstin e integrimit europian”.

Krahas veprimtarisë profesionale, Av. Andi Skënderi është anëtar i Këshillit Drejtues të Dhomës Kombëtare të Avokatisë, duke qenë i angazhuar në veprimtarinë institucionale të organizatës përfaqësuese të profesionit të avokatit dhe në çështje që lidhen me ushtrimin dhe zhvillimin e këtij profesioni.

Prej vitit 2023 është gjithashtu anëtar i Komisionit të Disiplinës pranë Federatës Shqiptare të Futbollit, duke ushtruar përgjegjësi në kuadër të strukturave institucionale të federatës.

Përvoja e tij profesionale ndërthur praktikën e avokatisë, drejtimin juridik, këshillimin ligjor të subjekteve private dhe institucioneve publike, si dhe angazhimin në struktura profesionale dhe institucionale.